Act 27 | ATA | STEP | Ioxe no mine nexi telutu sou lexe talai ne Itali, la ane'i mipalusi'a ilo'a ta mitema e mixolu no taasou navunavu ne milai noxou tila noxi'a ta mitema sou 'oto'oto e ualasou lexe Iuliasi. Anu vile no nano no anu la'oluxa'a noxou tatananu tuala Auxusuto.

a 27:2Apo 19:29

c 27:24Apo 23:11

d 27:26Apo 28:1

Acts 27

Paulo Mutelo no Lasipi sou Mulai ne Romu

1 Ioxe no mine nexi telutu sou lexe talai ne Itali, la ane'i mipalusi'a ilo'a ta mitema e mixolu no taasou navunavu ne milai noxou tila noxi'a ta mitema sou 'oto'oto e ualasou lexe Iuliasi. Anu vile no nano no anu la'oluxa'a noxou tatananu tuala Auxusuto. 2 ^aLa sou nexi tetelo no lasipi vile e molu mune'e no tuala tila ne Adolamitiami. La sou anu lasipi molu loxo lai ne te'una sou u'una uuatu no tuatuala mose'i muxolu no luaki pa'upa'umolu ne Asia. La sou telutu telai. La itema vile ualasou lexe Alisitaluko sie Tesalonika no xalee lia tila ne Makedonia anu a noxi'a tekei ne. 3 Xe no voxo vile ili'i la, la nexi telutu sou telai te'una ne Saidoni la Iuliasi mu'oxo 'ilixo laixe noxou Paulo sou mupelemasaxa noxou lexe ulai umaisi'a ta menexu mo uno'u la'ilali ilou mimii mose'i noxi'a. 4 Xe mukalu la nexi tetelo no lasipi la sou telutu telai la sivo toxoxa'a mune'e loxo no laxunexi, la sou nexi texexee te'una ne pa'umolu no 'a la'olu Kipulosi sou tepolopepeenu atume iou, xo atume ne xaviinu misevile sou u'oxe u'uouosixe. 5 La sou nexi teiave telai 'alai loxo no xalee lia tila ne Kilikia xe ne Pamfulia mukalu la sou nexi telai texali ne Mila no nano no xalee lia tila ne Lisia.

6 No mine nexi telai lai ne, la tila noxi'a ta mitema sou 'oto'oto mumaisou lasipi sie Alekisandolia vile ne mulutu sou lexe ulai ne Itali, la sou anu mu'italonexi no anu lasipi ane ne. 7 Ioxe nexi telutu lai ne la lasipi ne umomomo sou uiave xaviinu uasi mole nexi teiave se'isisi voxo tapiena mo ta mitema sou xaixai ne mitovo xavine'i sou mipamuxanu lasipi ne ia uiave xaviinu malaxo uasi xo sivo toxoxa'a mulivulivusou. Ia ane'i axiaxisi xo mole nexi telai texali no tuala tila ne Kuniidosi la sivo mutalunexe mole talai la ua. La sou nexi texiu telai no pa'umolu la'olu Kiliti sou te'ume tepolopepeenu atume iou. La nexi teiiave 'alai no kusinou ne Salumoni. 8 Xe ta mitema sou xaixai no lasipi ne miavuti la xavine'i manina sou mipamuxanu lasipi ne no luaki pa'umolusi, la sou nexi tene'e texali no tuala vile e ilemo lexe Tanixu lasipi laixe ^{▼▼27:8No tanixu lasipi laixe sou u'una no anu.} ne muxolu 'alai no tuala tila ne Lasia.

9 La voxo ta piena mukalu ia sivo ne muxolu pekia'u xo mole mulaulixu sosovo sou voxo noxi'a ta Iutaia e sou ipelemu no anu la sou anu voxo sou xasi tatila la Paulo muvikalane'i sou upeletotosi'a lexe, 10 “Ngalomu, eni elavusou lexe nenge talai maasi, la taxalisou sivo tatila la ta'uo'uo mo lasipi ilou mimii tapiena 'o tasiauxu mo nenge kalumo.” 11 Ia tila noxi'a ta mitema sou 'oto'oto ne mulomusou Paulo muvikala aloxo ne, la anu ulomuxu uasi, ia anu mumulinu vaikala noxou itema sou usaxila'a ta mitema sou xaixai sou lasipi ne ilou moosou lasipi. 12 Ane'i mitulu lai ne la mixamulinu sivo tatila misevile xo anu voxo sou sivo kalumo, la sou ane'i italume no xalee vile laixe uasi. La sou ta mitema tavu'alo no lasipi ne mivikala lexe, “Nenge taxexee no tuala ane 'o mo talai ne Pinikusi mo tatalume no anu sivo tatila 'o.” Tuala ne Pinikusi ne muxolu no nano ne Kiliti no xalee mulai loxo no mine aso ulu'elai no anu.

Sivo Muavutinoxu Xasi Toxoxa'a

13 No mine ane'i mimaisou sivo ane mune'e loxo no xalee to'o no anu ne xaviinu uasi la ane'i mixavutala lexe laixe sou ilutu ilai, la sou ane'i milapu axa e misakii no lamota sou mivau tu'umaxu lasipi no anu ne mutelo mukalu, la sou ane'i milutu sou lexe ilai i'una ne Kiliti. 14 Ia maxuveeni uasi la, sivo vile xaviinu misevile. Sivo ane ne sivo molu mununa no anu la'olu. Sivo ane ne ilemo lexe, “sivo molu mununa.” 15 Sivo toxoxa'a ne mune'e mutuvuvaxa no lasipi ne la mulivu sou pekia'u misevile mole ta mitema sou xaixai sou lasipi ne xavine'i sou ixiunu lasipi mo ilivu ne la umomomo uasi. La sou ane'i mi'italonu lasipi nesi sou sivo mutavulenu mulaixu no xalee ulai. 16 La sou mulai mupolopepeenu no anu la'olu vile kitu'a ilemo lexe Kauda. Xe no mine la'olu se ne mutaluxu sivo sevile la nexi tetovo xavinexi la sou telapunu lasipi kitu'a e lasipi ane tatila ulalapunu ne mune'e mutelo no anu lasipi ane tatila. 17 La ta mitema mimulaxu lasipi kitu'a teitexi no 'a lasipi tatila. La sou ta mitema mipolo lamota sou misakiinu mipita no lia no anu lasipi ane tila ne. Sou lexe utetelisou lasipi ane tila ne sou pekia'u. Mo sou no mine lexe anu uiave xe ulai utuvu no anu lialia ane muxolu no lia no luaki Silutisi ne, la anu upau uasi. Xe mukalu la sou ane'i milu'enu lavalava sou lasipi sou sivo mutavulenu lasipi. 18 Ia ili'i no voxo vile, la sivo ne ukalu uasi, anu muxali toxoxa'a mole ta mitema sou xaixai sou lasipi ne misokou sou mipeinu mimii se'i no lasipi ne sou muxexesou. 19 Xe no voxo tatalusou, la ane'i me'a mipeinu misomisou lasipi se'i. 20 Nexi temaisou lexe nexi umomomo sou tamaisou aso mo ta oto uasi voxo ta piena mo sivo tatila mu'oxo'oxone'i. La sou nexi ta piena ne texavutala lexe nexi tamomomo sou tamauli la uasi. 21 Voxo ta piena ne ta mitema i'ani la uasi. La sou Paulo muavuti mutulu no nixi io muvikala aloxo 'o, “Ngingi ukalu 'o, ngalomu. Lexe ngingi ngalomuxosi io nenge'a taxolu no la'olu ne Kiliti 'o, la umomomo sou nenge nenge'a taxalisou voxo masua ane 'o loxo 'o uasi, mo umomomo sou ngingi ngapeinu mimii ta piena loxo 'o uasi. 22 Ia vaimomo 'o avikalangengi lexe ngingi ukalusi opongengi uai se'isisi, xo umomomo sou ngingi vile tasiaungenge uasi. Mimii no lasipi ilou lasipisi anu tasiau. 23 Xo vaimomo no 'olovoxo, la angelo noxou Lataua e eni noxou mo elotu noxou ne mune'e mutulu no pa'umelo. 24 ^cLa muvikalaleli aloxo 'o, ‘Paulo na'ume mamu, xo nini nalai sou natulu no iou Kaisari xe Lataua ulosine mauli noxinge ngingi ngexolu no lasipi ne.’ 25 Aloxo ne, la sou anu laixe lexe ngingi umomomo sou nga'ume uasi. Xo eni amuxaxu taleli noxou Lataua lexe mii ne uxali noxinge aloxo Anu mulemolu. 26 ^dIa sivo utavulenu ulai u'osonixu no la'olu vile.”

Lasipi Mu'oso La Muvalavala

27 Xe no voxo mavulovexa mo mulu'e no lia tami'a sou no 'olovoxo, la nexi tepuati telai no luaki e ualasou lexe Adolia no 'olovoxo lixinu manina. Xe no 'olovoxo lixinu ulai 'alai, la ta mitema sou xaixai no lasipi ne mixavutala lexe lasipi ne no anu luaki pa'umolu. 28 Aloxo ne la sou ane'i mikalanu mii e sou itilovosou lautu no anu mulu'elai no lia no lexa xe mitelo mitilovosou, la tilovosou lautu ne mumomomo loxo mita itemaxu tamei. La ane'i misuku sevile la, mukalu la mikalaanu mii e sou itilovosou lautu no anu ne mulai no lia la. Xe milapunu mutelo sou mitilovosou, la mitaxu muxali loxo mavulovexa tatalu la laoutuxu mulu'elai. 29 Xe ane'i mimama'u sou lexe loxo 'o io lasipi ulai utuvu no anu kulukulu, la ane'i misuanu axa e misakii no anu lamota ne tami'a lololi no tau lasipi mulai no lia sou muvatu'umaxu lasipi sou mutulu. Io ane'i mikilaka sou lexe lamana palea. 30 Ta mitema sou xaixai no anu lasipi ne mikamuli vote'i sou lexe i'ume no anu lasipi ne, la ane'i milaxalixu lasipi kitu'a e mitelo misakii teitexi ne sou mikalavoi lexe ane'i isuanu axa se'i no anu uuli no lasipi kusinou sou uvatu'umaxu lasipi. 31 Xe Paulo muavuti la muvikalanu tila noxi'a ta mitema sou 'oto'oto ne aloxo 'o, “A lexe ta mitema ne ixolu teitexi no lasipi 'o si, la ngingi ngamauli.” 32 Xe ta mitema sou 'oto'oto miavuti la mixotonu lamota sou lasipi kitu'a ne sou mulapau mulu'elai no luaki.

33 Ioxe 'ala'alaisou lamana ukea la Paulo muavuti la muvikalane'i aloxo, ‘Ngingi ngano'u 'ani se'i mo nga'ou xo nga'ani uasi voxo mumomomo loxo mavulovexa vile mo mulu'e lia tami'a mukalu.’ 34 Aloxo ne la sou eni avikalangengi pekia'u lexe nga'ou la'ilali mose'i mo nga'ou sou u'oxo pekia'inge. Xo ngalomu, ngingi vile umomomo sou tasiaungenge uasi. Ngingi ta piena ne maasi la ngamauli.” 35 Anu muvikalane'i aloxo ne mukalu xe ili'i, la anu muno'u veleti ka mutulu no talaxa'a sou muvikala laixe noxou Lataua mukalu, la muse'ise'inu sou mulosi'a mio'u. 36 Xe ane'i mukalusi opone'i laixe mo mi'osa la me'a mino'u la'ilali sou mio'u. 37 Nexi mukalusi e texolu no lasipi ne nexi ta mitema itemaxu mavulovexa mo itemaxu tatalu mo mavulovexa vile mo muxatele vile (276). 38 Ane'i mi'ani mukalu, la mipeinu uiti mose'i mulai no luaki sou lexe papaxesou lasipi.

39 Xe no mine lamana mukea 'o, la ane'i imomomo sou itongonu tani xalee ma'ia ne lexe ane'i ilalai no anu ne uasi. Ia ane'i mimaisou luaki lalu'uxu minu vile ne mulai no nano manina. Ia tasi'isou lailaixe misevile. La sou ane'i mixavutala lexe ane'i umomomo sou iu'nalaixu lasipi no anu. La lasipi ulai u'oso no lia. 40 Xe ane'i miavuti la mixotosou lamota sou axa e misakiinu sou uvau tu'umaxu lasipi ne la musua mutaolu no lia no luaki ne. Xe miavuti la milulusou lamota sou lavole tatila ta tamei e sou i'isalilinoxu lasipi no anu. Xe ane'i miavuti la mitelaixu lavalava e sou sivo utuvu no anu la ulutunoxu lasipi ne. Io sivo mutavulenu lasipi sou mu'unalaixu no tasi'i ne. 41 Mu'unalai la ulai uxali no tasi'i uasi, xo mu'oso no anu lia minuvile e muxolu no luaki tanu. La lasipi kusinou mutotole pekia'u manina no anu, mole mutulu a vile. La sou xasi mune'e mu'otu'otunu lasipi nesi xo mole muvalavala.

42 Xe ta mitema sou 'oto'oto miavuti la mi'oxo lexe ive'ave'a ta mitema e mixolu no taasou navunavu e ilo'a mixolu teitexi no lasipi ne sou isoli, xo loxo 'o io ipisikei ilu'e no luaki la inoou sou ilai ixali no ale la i'ume'ume. 43 Ia tila noxi'a ta mitema sou 'oto'oto ne mumasaxa lexe usu'ulinu Paulo, la sou anu mukaitolone'i ta mitema sou 'oto'oto lexe mamu sou ive'a ta mitema ane mixolu no anu taasou navunavu e mitelo no lasipi. Ia anu muvikala pekia'u noxi'a ta mitema e imomomo sou noou sou lexe ipisikei ilu'e la sou inoou ilai ixali no tasi'i tei. 44 Xe ane'i ane ilavusou inoou uasi, la ipuati no anu ovu alelaxu ilou lasipi alealelaxu e muvalavala ne sou ilai ixali no anu no ale. Mu'oxo aloxo ne la sou ane'i tavu'alo mukalusi ne milai mixali no tasi'i mo mimauli mole vile tasiauxu uasisi.